A Lettera | Corti : un novu centrudi furmazione di i spenghjifochi

Sò sottumessi à l’ubligazione di furmazione iniziale è cuntinua i persunali di i servizii di succorsu è di a lotta contr’à l’incendii d’aeromobili di l’aeroporti di Corsica. Una furmazione chì tratta di a maestria di l’incendii di i mutori (à reazzione è cù l’elica), di a gestione di l’incendii di u trenu d’atterraghju, di l’estinzione di l’incendii à l’internu di a cabina (sedi, cucina, cabina di pilutaghju), di a gestione di i sversamenti di carburante (incendii di superficia), di u portu di l’apparechji respiratorii isulanti (ARI), è dinù di e prucedure d’evacuazione d’urgenza di i passageri. Sò tante e missione per e quale i spenghjifochi è i capimachja di manuvra di i nostri quattru aeroporti seguitanu di modu regulare corsi di furmazione o di riciculu in unu di i dui soli centri aggraditi, Châteauroux è Auch.

Un prugettu innuvativu, purtadore di una ambizione per a Corsica

U futuru centru di Corti custituisce un’innuvazione à scala isulana : riuniscerà, nant’à un listessu situ, e furmazione regulamentarie di i persunali, un simulatore d’incendii veri d’aeromobili, e cumpetenze di e quattru piattaforme aeroportuarie corse è i mezi messi in cumunu cù u SIS 2B. Permetterà à a Corsica st’urganisazione integrata di ammaestrà sopra locu una filiera di furmazione strategica chì, sin’à avà, dipendia largamente da strutture chì si trovanu in cuntinente.

Al di là di a so dimensione tecnica, si busca u prugettu una purtata inedita, in quantu à una scelta strutturante per u territoriu : rinfurzà a maturità uperaziunale di a Corsica, territurializà e cumpetenze è l’impieghi qualificati, cunsulidà u serviziu publicu di securità aeroportuaria è turnà à equilibrà l’attività à prò di l’internu di l’isula.

Fendu di Corti un centru di riferenza apertu à u Mediterraniu, feria l’EPCI di Corsica da st’innuvazione un strumentu di spertizia, di cuesione territuriale è di splendore.

U prugettu ùn averia micca a listessa purtata senza a participazione di u Serviziu d’incendiu è di succorsu di u Cismonte (SIS 2B), assuciatu à a so cuncezzione dapoi l’origine. Arreca ciò chì un operatore aeroportuariu ùn pussede micca propiu : piattaforme tecniche, una vera ingeneria di a furmazione à i risichi è una pratica cutidiana di u cumandu di l’operazione di succorsu.

Prisenta infine sta cuuperazione un vantaghju propiu operaziunale : in casu d’accidente d’aeromobile, intervenenu inseme i spenghjifochi di u SIS è i spenghjifochi d’aerodromu. Furmà si inseme, nant’à e listesse istallazione è cù i listessi riferimenti, vale à dì dà si i mezi per agisce megliu u ghjornu di l’evenimentu.

Corti, a scelta ideale per stallà si

Tenutu contu di u costu attuale (450 000 € à l’annu) ch’elle raprisentanu e sessione di furmazione cuntinua di i persunali aeroportuarii, porta di fatti l’EPCI di Corsica u prugettu di creà u so propiu centru regiunale chì, impiantatu in Corti, permetteria micca solu di risponde à l’esigenze regulamentarie è di fà risparmii impurtanti, ma dinù di cuntribuisce à u sviluppu ecunomicu di u centru di a Corsica.

Un stabilimentu versu u quale puderianu in fatti vultà si altri uperatorii aeroportuarii, in particulare quelli di u sudu di u paese, tantu hè vera chì hè più faciule di ghjunghje in Corsica da Nizza o da Marseglia chè d’andà in l’Indre o in u Gers !

Un’impiantazione d’altronde ancu più ghjudiziosa chì, al di là di a so pusizione geugrafica in core à a nostra isula, di una cunfigurazione aeronautica favurevule à a creazione di un tale centru è di a superficia fundiaria dispunibule nant’à l’aerodromu di Corti, a cità gode d’infrastrutture d’accolta di qualità grazia à l’Università (residenza studientina per l’alloghju, anfiteatri, sale di corsi, bibliuteche…).

Tuttu per permette d’urganizà e sessione in cundizione propiu bone.

Acquistu d’un simulatore di prestazione

Cù l’accunsentu di l’ultimu Cunsigliu d’amministrazione di l’EPCI di Corsica, serà sottumessu u prugettu à un studiu destinatu à cunsulidà u so finanziamentu, mubilizendu in particulare i fondi europei accessibili in u quadru di i territorii isulani è di u sviluppu di i servizii di securità civile.

Frà l’investimenti necessarii figura l’acquistu d’un simulatore nant’à u quale i persunali puderanu esercità si à luttà contr’à tutti i tippi d’incendii è risponde à e so ubligazione regulamentarie di furmazione in situazione reale, in cundizione di securità cunforme à l’esigenze di l’AESA, l’Agenzia di l’Unione Europea per a Securità Aerea.

A scelta hè cascata nant’à un simulatore fissu di tipu FIRETRAINER® A-500, chì riproduce nant’à una macchetta d’aeromobile l’integralità di i scenarii regulamentarii – incendii di mutori à reazzione è cù l’elica, trenu d’atterraghju, cabina, cabina di pilotaghju, sversamentu di carburante –, senza scaricamentu di liquidi inquinanti.

Ci si aghjusta a creazione di una torre di cuntrollu pedagogica, affinchì i scenarii sianu u più realisti pussibule.

U futuru centru di Corti ùn hà quantunque micca per vucazione di accoglie solu e furmazione nant’à l’incendii veri. Hè cuncipitu cum’è un centru unicu, chì riunisce l’inseme di e qualificazione regulamentarie richieste à i persunali di u serviziu di salvezza è di lotta contr’à l’incendii d’aeromobili (SSLIA / RFFS) è di u serviziu di prevenzione di u risicu animale (SPRA) di i quattru aeroporti di l’isula.

Lire La Lettre n°68