À l’incuntrariu di e cridenze pupulare, ùn hè un alliatu u tempu, ùn aiuta tantu à scioglie i prublemi. Inde a situazione ecunomica à a quale hè cunfruntata oghje ghjornu, ùn hà mancu appena bisognu a Corsica di esse un ricettaculu di malintesi. E chjave bone sò u dialogu, a spressione di i risentiti, l’ascolta di i sentimenti di l’altri, a brama di sparte e so percezzione è e so inchietudine. Eccu u rispettu veru. Hè incù quellu spiritu ch’ella hà pigliatu a so piazza Françoise Gatel à u palazzu cunsulariu di Bastia, a sede di l’EPCI di Corsica, per ascultà à ochji à ochji l’attori ecunomichi di u territoriu.
Cum’è tutti i so culleghi di u guvernu, a Ministra di l’Accunciamentu di u Territoriu è di a Decentralizazione, chì u so mandatu si presume di esse di corta durata, hà pruvatu à rassicurà u publicu, fendu casu di ùn fà prumesse ch’ella ùn seria micca capace à tene. L’hà detta trà e parolle è incù l’onestità chì omu li cunnosce. Li hè statu rimessu un cartulare cumplettu nantu à e debbulezze strutturale è l’inerzie chì puderianu esse minurate per via di una tassazione sopra misura è di aghjustamenti nurmativi suggeriti à i parlamentarii da u prugettu di lege nantu à l’autunumia. Ella si n’occuperà in u tempu chì li hè statu assignatu…
« Mette in ballu un equilibriu istituziunale novu »
Inde e so parolle d’introitu, hè vultatu Gilles Simeoni nant’à l’unanimità di u Parlamentu rilativu à a creazione di l’EPCI di Corsica, guardianu di a perennità di l’istituzione cunsularia, di i so salariati, di e so missione, chì arreca una garanzia definitiva per a gestione publica di i porti è di l’aeroporti di a Corsica. Una riescita cumuna di a Corsica è di a raprisentazione naziunale chì puderia esse di auguriu bonu per piglià u caminu di Versaglie, chì serà una scimità di vulè oppone a riforma custituziunale è u statutu d’autunumia à u regulamentu di i prublema di ogni ghjornu. À u cuntrariu, hè tuttu cullegatu di modu strettu. »
U discorsu ecunomicu di fondu, l’hà prununziatu Jean Dominici, u primu vice presidente di u Stabilimentu, purtendu à Françoise Gatel à ingagià si nant’à un puntu : pone a prima petra di u trasferimentu di a Camera regiunale di i Mistieri è di l’Artisgianatu à a Cullettività di Corsica. « Puderemu tandu cunsiderà chì a Corsica si tenerà un ecusistema cunsulariu cumplettu, mudernu, di perfurmanza è urganizatu propiu bè per agisce cù efficacità è raziunalità à prò di l’ecunumia di u territoriu è soprattuttu à prò di i nostri sudditi. »
Hà spiecatu à a ministra Jean Dominici, dopu avè li ramintatu u so passatu cunsulariu, « senza presa di pusizione pulitica, nè dogma nè calculu », ch’ella pisava l’accumulazione di i cunflitti geopulitichi nant’à e filiere d’attività corse in generale, è quelle di u turisimu in particulare, aggravendu puru i svantaghji strutturali di l’isulanità chì esigenu un equilibriu istituziunale novu è una equità fiscale cum’è arnese di salvamentu nant’à u mare marusulatu di u mondu.
« L’equità fiscale cum’è spressione di ghjustizia »
À nome di l’UMIH di Corsica, ramenta Karina Goffi u tridente di e custrette chì inghjennanu per l’intraprese un sopra costu mezanu di 9 % nant’à u so sciffru d’affari : l’isulanità, a strettezza di u mercatu è l’iper stagiunalità. Permetterà solu una pulitica fiscale adattata di alignà u mudellu ecunomicu di a Corsica nant’à ste realità. « Passa per via di una riduzzione di e cariche nant’à l’intraprese, un ritornu à una TVA à 8 % nant’à a risturazione, un impositu nant’à e sucetà à 15 % per incuragisce l’investimentu lucale è un creditu d’impositu rinfurzatu chì inghjude a rinnuvazione di i stabilimenti usteriaghji. Ùn hè micca un fine l’equità fiscale, hè una spressione di ghjustizia. »
Hè suggeritu un altru arnese da ch’elli possinu agisce cù di più efficacità i puteri publichi ; a pruliferazione di l’ammubulati di turisimu, chì inghjenna una distursione di cuncurrenza à discapitu di i prufeziunali chì facenu l’albergu è chì sò, elli, propiu sughjucati à tutte l’ubligazione fiscale, suciale è nurmative. « Di pettu à sta deriva, ci hè oramai a necessità di una classifica ubligatoria di l’ammubulati subbitu per a prima messa in affittu. »
Sottu à a bandera di i traspurtadori, rigreta José Benzoni l’assenza di riflessione alternativa à a tassa eculogica imposta da Brusselle, chì mette a prufezione in dinochji, face inciampà propiu e cumpagnie è appighjureghja u putere di compra di i Corsi. « Ùn simu micca contru à a riduzzione di l’impronta di carboniu, ma contru à a misure murtifere per e nostre intraprese. Deve esse intesa a Corsica da l’istanze europee, cum’elle sò state d’altre regione periferiche di u Mediterraniu. »
Hè stata ammintata l’evuluzione cunsularia di a CRMA da u so secondu vice presidente Dominique Susini è a crisa di u BTP prisentata incù i ditaglii da Dominique Antoniotti. In fine, teme Jean-Louis Albertini, u presidente di u Medef di Corsica, ch’elli sianu cuntaminati i capi d’intrapresa da u siscu di u lentaghine è di a perdita di cunfidenza « di pettu à una situazione di viulenza ecunomica strema. » Per ellu, cum’è per tutti l’altri, l’urgenza ci serà à fà i curamenti cù i vaccini boni.
« Ciò ch’è no vulemu, hè ch’ella trovi prestu a Corsica un equilibriu istituziunale, una lisibilità fiscale, una stabilità inde un mondu chì ellu, l’hè di menu in menu. »
Jean Dominici, primu vice presidente di l’EPCI di Corsica