Ùn hè micca stata bona a stagione in Corsica. Vi appruntate à campà una rientrata propiu afflitta per i nostri suditi ?
Sò stati assai pessimi l’avanti stagione è u mese di lugliu per u settore di u turisimu. Pare chì u mese d’aostu è a fine di a stagione sippianu un pocu menu sgradati, ma ùn permetterà mancu appena di richjappà tutte e perdite digià arregistrate. Dopu un bruttu annu 2023, averemu dunque un bruttu annu in u 2024 è sta sequenza, sta perdita ecunomica di pettu à a nostra attività principale, hè in fatti una primura maiò per a viabilità di i cummerci è di l’imprese isulane, perchè chì u turismu, in modu direttu è indottu, irriga tutta l’ecunumia di a Corsica. Allora sì, ci simu appruntati à una rientrata propiu trammanata è à un invernu difficiule.
Cumu spiegà u distaccu trà un tassulu di occupazione chì suddisface per i battelli è l’aviò è st’alberghe è l’osterie diserte ?
Parechji fattori sò in traccia di move è parenu propiu sfavurevuli per noi. Prima, l’offerta di trasporti, in particulare in u settore di l’aereu, ùn basta micca in quantu à e sede è e linee, ciò chì porta à una saturazione cronica ; in u frattempu, i prezzi sò assai troppu altu, ch’ella sia in valore assulutu è soprattuttu paragunatu à tutte l’altri destinazione cuncurrente in u Mediterraniu. U bugettu chì ferma à cunsumà sopra locu, digià malmessu da i prublemi di u putere di compra, hè dunque sempre à calà, ci porta à sughjorni più corti, di menu spese, a ricerca di e suluzione menu caru per l’alloghju, manghjà è visità l’isula è dunque una crescita d’appetittu per e suluzione para cumerciale chì abbundanu oramai in tutti i settori di l’ecunumia corsa.
Dinunzianu dapoi anni è anni i prufessiunali, cù voi in testa, l’ecunumia parallela, in parte occulta, di u paraturisimu. Cumu spiecà u lascia corre di i puteri publichi ?
Propiu ùn si pò capisce ! Di sicuru, unepoche d’iniziative curagiose ci sò inde certe cumune per ammaestrà l’offerta di affittu nant’à u so territoriu ma propiu ùn bastanu micca. Ci manca di modu chjaru un quadru glubale è dinamicu per a lotta, prima à u livellu naziunale è dopu à u livellu lucale, per tirà à frenu è regulà stu marosu di fondu chì mette à male di modu seriu a resilienza di a nostra ecunumia è minaccia imprese è impieghi numerosi. Da per tuttu in altrò, assistemu à risposte assai di più vigurose di limitazione è cuntrolli, puru di sanzione per l’abusi è l’eccessi, aghju vistu ancu pocu fà chì a cità di Seviglia hà decisu di taglià l’acqua à l’abitazione chì eranu identificate cum’è affitti salvatichi. Malgradu l’avvisi numerosi di i prufessiunali, quelli di l’UMIH Corsica in particulare, i nostri, quelli di l’altri sindicati, si vede chì in Corsica stu fenomenu è i danni ecunomichi ch’ellu cagiuneghja ùn sò ancu stati risolti in tuttu.
Sò stati cunfruntati dinù à una penuria di persunali qualificati. Puderà arrecà qualcosa di pusitivu a creazione di una grande scola di turisimu in Aiacciu ?
Hè tuttu prontu ! Ci manca solu l’auturizazione di a Cullettività di Corsica è a cunferma di a so cuntribuzione finanziaria per lancià i travagli di riabilitazione di u Palazzu di i Cungressi d’Aiacciu è a creazione inde stu locu stessu d’una scola di turisimu di altu livellu, in partinariatu cù a Camera Regiunale di i Mistieri è di l’Artisgianatu, l’AFPA, a scola osteriaghja d’Avignone, quella di Savignac è tanti altri attori numerosi. Da u principiu datu, ci vulerà à travaglià cù i prufessiunali corsi per ch’elli s’impegninu direttamente inde l’urganisazione è u funziunamentu di sta scola ch’è no vulemu marcata cù un altu livellu di esigenza educativa à u serviziu direttu di l’attori di u mistieru, di i pruduttori, di i risturatori è di l’osteriaghji.
Eppuru, malgradu i vostri sforzi, i giovani corsi sò sempre di menu attratti da a furmazione prufessiunale. Chì ci vulerà à fà, secondu voi ?
Certi pensanu chì i giovani si alluntaneghjanu da i mistieri ecunomichi, d’altri chì hè l’ecunumia chì si alluntaneghja da a nostra ghjuventù, pocu impreme, chì u custattu hè, fatta fine, u listessu : a nostra ghjuventù ùn hè micca abbastanza centralizata in e pulitiche publiche di sviluppu, nutrisce u sintimu di ùn truvà ci u so postu. Ci vole ch’ella cambii è prestu ! Per quessa, mi pare essenziale di rifurmà di manera prufonda i diversi sistemi d’aiuti è di accumpagnamentu, di priurizà a trasmissione è a ripresa, è di innuvà in a cunsegna di l’opportunità ecunomiche à i nostri giovani. Ma, in u listessu tempu ch’è no rinfurzeremu a so presa in cunsiderazione, ci tuccherà à rinfurzà, in attesa è in rigore, hè u nostru avvene, ancu u nostru prisente, è a custruzzione deve esse attenta, generosa ma propiu esigente.
Sò stati dinù messi in alerta i tribunali di cummerciu nant’à a situazione sgradata di u BTP è di u cummerciu di prussimità. Chì si puderà fà per curà stu male chì si face sente sempre di più ?
Propiu, mi pare urgente è vitale di fà un aggiornamento. I settori maiò di u turisimu, di u BTP, di u cummerciu, di i trasporti, sò in crisa, l’altri seranu tutti tocchi di modu direttu o indirettu. Avemu travagliatu, dapoi u 2020, cù u cabinettu internaziunale EY Consulting, nant’à un pianu di resistenza è di rilanciu di l’ecunumia corsa, cù 58 misure, frà e quale 16 ci parenu priuritarie, una lista di prugetti à mette in ballu di modu urgente. Ùn hè statu accoltu stu pianu cum’è a speravamu. Ùn pudemu chè custattà ch’ellu hè d’attualità, più chè mai, è simu uperaziunali per cuntribuisce à attualizà lu, priurizà lu è mette lu in ballu.
Chì misure di stu pianu metteriate in testa di e vostre priurità ?
A messa in ballu di una ingenieria di prugetti à u serviziu di l’intraprese, u schema di rilanciu di u turisimu corsu, a creazione di un portafogliu per investisce inde l’ecchippamenti strutturanti chì ne anu u più bisognu, pensu in particulare à i porti è à l’aeroporti. Hè indispensevule quant’è di favurizà a ripresa di l’attività di u BTP cù a cummanda publica è di allungà u calendariu di rimborsu di u PGE per l’intrapresa in situazione pessima. D’altronde, deve esse rinfurzatu u creditu d’impositu è d’investimentu corsu, è ancu rinnuvellatu è riurientatu.
Hà messa in ballu a CCI di Corsica un studiu chì face vede chì l’intraprese ùn sò di arme uguale cù quelle di u Cuntinente. Cumu si puderà culmà u fossu ?
In fatti, avemu fattu a dimustrazione, in u 2018 po in u 2019, per via di i studii Goodwill management, chì i sopracosti liati à l’isulanità è suppurtati da e nostre intraprese raprisentavanu à u minimu di e stimazione, più di 700 milioni d’eurò à l’annu, invece chì e misure fiscale proprie à a Corsica eranu di 100 milioni d’eurò à l’annu, vale à dì sette volte di menu. Simu luntanu da u contu è l’equità di e cundizione ecunomiche trà una intrapresa isulana è una di u cuntinente ùn hè micca rispettata. Passa a suluzione per via di un statutu fiscale è suciale ambiziosu è adattatu à sta situazione di distursione. Avemu fattu pruposte numerose, virtuose è efficace, in particulare a perennisazione è a stensione di u creditu d’impositu investimentu, à u quale facia riferenza, ma quì dinù, ùn avemu micca ricevutu a risposta chì aviamu u dirittu di aspettà.
Hà scumessu assai a Corsica nant’à u prucedimentu d’autunumia cù un novu statutu fiscale adattatu, ma hà mandatu tuttu à spassu a dissuluzione ? Serà un’altra decezzione ?
Iè, propiu ! Sò state rinviate à u benefiziu di stu statutu tutte e riforme ecunomiche, statutarie, fiscale è suciale, ch’è no prupuniamu dapoi parechji anni. Di fatti hè stata propiu un scumpientu a so messa trà parentesi. Ancu di più chè quessa, risicheghjanu l’istabilità pulitica naziunale, a crisa bugetaria di u Statu è u cuntestu internaziunale incandescente, di lampà i cartulari corsi fora di e priurità di u guvernu futuru è serà tandu torna una gattiva nutizia…
U 31 di dicembre di u 2024, ghjunghjerà à a fine u cuntrattu di cuncessione di a CCI di Corsica per gestisce i porti è l’aeroporti. Cumu puderà fà a Cullettività di Corsica da ch’elle ùn sianu mandate st’infrastrutture in manu à u privatu ?
Tocca à ella à dì la ! Avemu fattu pruposte numerose dapoi quelle chì anu cunduttu à l’articulu 46 di a lege Pattu è u scambiamentu di tutella fin’à, pocu fà, a creazione di un Sindicatu Mistu Apertu (SMO) trà a Cullettività di Corsica è a CCI. Esistenu e suluzione è sò nant’à u tavulinu. Averemu, per a nostra parte, un’assemblea generale strasurdinaria u 3 d’ottobre per deliberà nant’à sta situazione angusciosa è oramai critica chì ùn si puderà arregulà senza accelerà u ritimu inde l’istanze di decisione di a Cullettività di Corsica. Un scontru recente cù u presidente di u Cunsigliu esecutivu hà apertu un chjassu di risuluzione cù un calendariu d’aduzzione di un statutu di SMO per l’aeroporti è i porti frà i quali a CCI si tenerebbe a gestione sott’à a legittimità istituziunale di a Cullettività di Corsica. Ùn ferma più chè à mette lu in ballu…
Gestione di e cuncessione portuarie è aeroportuarie
Un’assemblea generale strasurdinaria
A strada senza sboccu ch’ellu raprisenta u trasferimentu di tutella di a CCI di Corsica à a Cullettività di Corsica, piantatu inde u so slanciu dopu à i turmenti pulitichi à u livellu naziunale, hà purtatu a nostra camera à avvicinà si prestu à u presidente di u Cunsigliu esecutivu di Corsica per perennizà a gestione di i porti è di l’aeroporti inde u duminiu publicu. Hè una corsa contru à u tempu chì hè stata iniziata, chì scadenu i cuntratti di gestione toccu u 31 di dicembre di u 2024. S’è ùn hè fattu nunda inde u frattempu, seranu periculose e cunsiquenze per a guvernanza è l’ecunumia di e nostre infrastrutture di trasportu vitale per un territoriu isulanu. Cunsiste a suluzione ghjuridica a più sicura à a creazione di SMO, di Sindicati Misti Aperti, chì permettenu a cuuperazione di cullettività territuriale è di persone murale di dirittu publicu cum’è e camere cunsularie per l’attività d’interessu generale. Hà pigliatu dinù Jean Dominici a decisione di adunisce un’assemblea generale strasurdinaria ghjovi u 3 d’ottobre à 10 ore è mezu di matina, à u Palazzu di i Cungressi d’Aiacciu. Seranu à l’ordine di u ghjornu parechje pruposte di deliberazione ma a più impurtante tocca di fatti a creazione di sti SMO per a quale u presidente di a CCI di Corsica dumanderà, in a so qualità di presidente, un mandatu da pudè fà tutti l’atti necessarii à a finalisazione di stu prugettu di prima trinca cù a Cullettività di Corsica.
Article publié dans La Lettre n°46
Lire l’interview en version française