U sciffru : 2,2
In milioni d’eurò, hè a somma di e spese cunsacrate à u solu accunciamentu di a scola. Un cantieru compiu in ottu mesi, chì si scrive di modu più largu inde u quadru di a rinnuvazione di u Palazzu di i Cungressi per 3,6 milioni d’eurò. Hè spartuta a fattura glubale di 5,8 milioni d’eurò trà u Statu, a Cullettività di Corsica, a CCI, EDF è a Cumunità d’agglumerazione di u circondu aiaccinu.
Hà messu u tempu à maturà u prugettu, ma serà di sicuru u risultatu à l’altura di a vuluntà di i dicidori, di quelli chì l’anu cuncipitu, di l’attese di a ghjuventù corsa è di a prufessione. U 17 di sittembre, anu urganizatu a CMA è a CCI una « ghjurnata porte aperte » da chì ognunu si possi rende contu di l’avanzamentu di u cantieru. È fà si una idea di più precisa di u quadru è di l’ambiente in i quali si hè accunciata a Scola Usteriaghja di u Mediterraniu, ma dinù i mezi chì seranu messi à a dispusizione di i furmatori è di a centinaia di st’amparanti cucinari di a prima prumuzione aspettata u 3 di nuvembre per a rientrata. « Serà u puntu di partenza di un’avventura nova vulsuta da l’eletti cunsularii è u mondu di l’intrapresa. Face un bellu pezzu ch’elli speranu l’attori ecunomichi di vede stu prugettu cuncretizà si. Avà ci simu. Ci seranu ammaniti tutti l’aspetti di i mistieri di l’usteria è di a risturazione : a cucina, a cantinaria, u serviziu, u maneghjimentu… »
Purtata da a Camera di u Cummerciu è di l’Industria di Corsica, a Camera regiunale di i Mistieri è di l’Artisgianatu, u Gruppu Amparà Mediterraniu – chì ne hà da assicurà a gestione – è i so partinarii accademichi, cullegata cù e scole di Savignac è d’Avignon, sustenuta è accumpagnata da l’Unione di i mistieri è di l’industrie di l’usteria (UMIH) è a Chjerchja di e Grande case di Corsica, l’Università di Corsica, l’AFPA è l’Accademia, aspira sta scola unica à diventà un polu di eccellenza in Corsica è in u Mediterraniu.
Hè u Palazzu di i Cungressi una sopra valuta inde a furmazione di sti giovani chì seranu assuciati à a cuncipitura di l’offerta evenimenziale di u stabilimentu. « Li permetterà sta interazzione di arricchisce a so sperienza prufeziunale è di fà l’acquistu di cumpetenze più grande. Hè tuttu aggruppatu quì cù l’ambizione di fà campà un’avventura particulare à l’amparanti, di creà vucazione, di favurizà un’adesione larga à i mistieri di l’osteria è di a risturazione, cù furmazione chì sò aperte à u livellu internaziunale. »
I bisogni impurtanti in quantu à a manu d’opera qualificata
Vanu e furmazione pruposte da u certificatu di capacità prufeziunale fin’à u bascigliè + 3 : CAP di cucina, CAP di serviziu, CAP di pastizzeria, CAP di cantinaria, brivettu prufeziunale Arte di a cucina è di u serviziu, bachelor maneghjimentu usteria è risturazione. Sò accolti l’elevi à parte si da 15 anni dopu à una scola di terza, è seguitanu una furmazione in alternanza trà i corsi à a scola è i periudi di messa in pratica inde i stabilimenti partinarii di l’istituzione. Seranu i sbocchi à a misura di i bisogni in quantu à a manu d’opera qualificata : impurtanti assai !
« Per l’annu di u 2025, raprisentanu i bisogni di i mistieri di u turisimu circa 1500 giovani diplumati, per via di un effettu di rinnuvellamentu di e generazione. È sò mancu 150 giovani diplumati, di tutti i livelli, chì sortanu da e strutture chì esistenu », preciseghja Jean-Baptiste Pieri, u sicretariu generale di u Chjerchju di e Grande case di Corsica. Un grande scartu ch’ella deve propiu cuntribuà à riduce a Scola usteriaghja di u Mediterraniu – cù una capacità d’accolta chì pò cullà fin’à 400 elevi – longu à e sessione…
Dopu à una prisentazione inde a sale di cunferenze, hà visitatu u publicu l’istallazione mentre ch’elli sò affaccendati l’uperai nant’à u cantieru è ch’ella vene di esse livrata a mubiglia… Si stendenu e strutture di a scola nant’à una surfazia tutale di circa 1000 metri quadrati inde i quali sò spartuti nove classe, cinque camere frete (cù un accessu direttu per via di i colla cariche) è un tavulatu tecnicu di alta qualità : una cucina propiu ecchippata, u lava piatti, un lucale, è una grande sala di risturazione cù e so terrazze nant’à u mare. Ùn ci hè più chè da fà !
Marc Goetz, direttore di l’albergu di u Golfu in Aiacciu è presidente di l’UMIH di u Pumonte
« Sò prisente quì per via di duie cagione. Prima, perchè chì aghju da intervene cum’è furmatore ; dopu è soprattuttu, perchè ch’ella accumpagna a prufessione stu prugettu. Hè impurtante di fà cresce u numeru di cullaburatori per copre propiu i bisogni inde i sfarenti stabilimenti in Corsica, di avè ghjente di più furmate, cù un spiritu di spartera di l’elementi di a distinazione. Hà da permette u fattu di riceve una furmazione sopra locu di risponde megliu à l’attese di i clienti, à a so brama per a cunniscenza è a scuperta di u territoriu. U fattu ch’ella sippia stallata quì sta scola hà da cullegà, intuitivamente, a Corsica cù e prufessione chì sò prisentate. Ci serà di fatti una acculturazione assai forte, ditagliata cù storie cuncrete da cuntà, nant’à u mele, a vinificazione, ecc. Custitueghja tuttu què un valore aghjustatu di u territoriu corsu di pettu à sti giovani. Entrenu inde stu mistieru cù a pussibilità di prugressà, è pò esse sta scola usteriaghja un arnese perfettu per ch’ella sia scumpartuta o seguitata a furmazione à parechji mumenti di a vita, puru inde i prugetti di ricunversione è di ripresa di un stabilimentu ».
Emmanuel Lojou – « A cucina, ghjè ellu ! »
Per parudià una publicità, diceremu chì « a cucina, ghjè ellu ! ». À guasi 50 anni, hà Emmanuel Lojou una dusatura bella di tutti ciò chì si sbullisgina inde una cucina, a trasmette, l’insegna, a sparte cù sti giovani, invitati di fatti à cunsumà i so corsi senza muderazione…
Uriginariu di Locquémeau, inde e Côtes d’Armor, ampara u mistieru Lojou à parte da 15 anni. Furmatore mentre una decina d’anni à a facultà di i mistieri di Rennes, capi pastizzeru inde un grande risturante, po stallatu à contu soiu, tocca per a prima volta l’eccellenza in u 2007 quand’ellu si busca, in Toulouse, u titulu di « Campione di Francia di i dolci » per un « pralinatu yuzu cù u tè verde ». Ghjuntu in Corsica in u 2017, prufessore di cucina ind’è Amparà, hè statu intrunizatu, d’inguernu scorsu in Deauville, « Maestru cucinaru di Francia. » Vale à dì ch’ella tene quì a scola usteriaghja un insignante propiu di « prima scelta. »
« A cucina, ghjè ellu ! », dinù, perchè ch’ellu ne hà disegnatu i piani, decisu l’accunciamentu, selezziunatu u materiale, arrestatu a so scelta nant’à i migliori pianò induv’elli puderanu recità « l’amparanti cucinari » e so gamme intantu di caccià ne e prime note sapurite… « Avemu fattu di manera à accuncià u spaziu u megliu pussibule, à rende lu di più funziunale è u più aggradevule pussibule, per chì ognunu possa piglià ci u piacè, si senti à l’asgiu, benefizieghji di e cundizione e più bone, per amparà u mistieru. Anu da pudè si sparte, sti giovani adduniti in brigate, è girà nant’à i posti : entrate, piatti caldi, dolci… »
Inde a grande sala di risturazione, averanu l’invitati una vista panuramica eccezziunale nant’à u golfu. È dinù una vista diretta nant’à a cucina detta « di lanciamentu » per via di una apertura creata à posta. « Cusì, puderanu fidighjà l’elevi chì travaglianu ». Hè tandu un’evidenza ch’elli sò adduniti tutti l’ingredienti per chì l’affare dessi una salsa bona…
