« Venimu per vede cumu si pò dutà a Corsica di prerugative nove chì li anu da permette di fà fronte u megliu pussibule à tutte l’imbusche ecunomiche è suciale di u territoriu. »
Florent Boudié, presidente di a Cummissione di e lege à l’Assemblea naziunale.
« Hè messu sottu à pressione u nostru ecusistema da una soma di custrette. Eccu perchè ch’ella hà bisognu l’ecunumia di a Corsica di un veru statutu fiscale è suciale. »
Jean Dominici, presidente di a CCI di Corsica.
Hè oramai arradicata una certezza inde tutte e mente : esiste una cunnezzione, è puru una inter dipendenza, trà u futuru statutu d’autunumia di a Corsica chì, nant’à i chjassi petricosi di a pulitica naziunale, principia a so ultima linea diritta, l’arisurpera – omancu per parte – di l’inugualità di e scenze trà l’intraprese corse è quelle di u Cuntinente, è a necessità di rifurmà u statutu di a CCI di Corsica per avvicinà la à a Cullettività di Corsica, à a quale cunsacreghja a maiò parte di e so missione. Omancu per sacralizà di modu duraticciu a gestione di i porti è di l’aeroporti.
Sta certezza, era propiu indispensevule di sparte la cù a Cummissione di e lege di l’Assemblea naziunale, missiunata in Corsica per finalizà u testu di u prugettu di lege custituziunale chì, secondu u calendariu stabilitu in modu teoricu, serà prisentatu in cunsigliu di i ministri à u più tardi per u mese di ghjugnu incù e speme di pudè addunisce l’inseme di i deputati è di i senatori in cungressu in Versaglie da quì à a fine di l’annu.
A CCI di Corsica, puntellu ecunomicu di u prucedimentu
U scontru cù a delegazione, assai varia à u livellu puliticu, di a missione d’infurmazione esciuta da a Cummissione di e lege, si hè fattu à u Palazzu cunsulariu mercuri scorsu.
Hà fattu cunnosce u so presidente rapurtadore, Florent Boudié, i cuntorni di a so lettera di missione : « Dapoi a dissuluzione, hè smarrita da e priurità l’evuluzione istituziunale di a Corsica, ma circhemu à fà ch’ellu sia messu in pusessu u Parlamentu di a basa di ciò chì era statu neguziatu trà l’eletti di l’isula è Gérald Darmanin. Hà da rende e so cunclusione a Cummissione di e lege à u più tardi per a metà d’aprile. Si tratta per ella di vede, da una parte, cumu si ponu rinfurzà i puteri chì esistenu per a Cullettività di Corsica è, da l’altra parte, di mette in risaltu, u megliu pussibule, l’imbusche ecunomiche è suciale di u territoriu. » Hè deputatu di a Gironda Florent Boudié, di fatti serà piuttostu bon segnu per l’avvene istituziunale di l’isula di fà ste pattighjate cù un… girondinu.
U fattu ch’ella sia inde e dispusizione bone sta delegazione di legislatori hà ralegratu u presidente di u Cunsigliu esecutivu. « Hè strettu u calendariu ma hè grande a qualità di l’ascoltu. Avemu prugrammatu stu scambiu à a CCI di Corsica postu ch’ella ùn si pò staccà a dimensione pulitica da a dimensione ecunomica è suciale. S’elle ponu esse arregulate à dirittu custante certe prublematiche, per d’altre è per cuncipisce orizonti novi, serà u statutu d’autunumia a porta naturale per u nostru territoriu… »
Hè a CCI di Corsica l’istituzione centrale in core à tutte l’imbusche è i prugetti di u paisaghju ecunomicu di l’isula. Li dà a gestione di i porti è di l’aeroporti un rollu propiu atipicu à u livellu naziunale. L’hà ramintatu cun forza u presidente Dominici, nanzu di ammintà dui temi liati propiu à u prucedimentu istituziunale : a fiscalità di l’intraprese, è ci vulerà prima à mandà via l’idea falsa secondu a quale puderia benefizià a Corsica di una forma di prudigalità d’esunerazione fiscale, è l’ecchippamenti sottu dimensiunati malgradu i piani di investimentu di u Statu è chì ùn vanu tantu di paghju cù e sfide di dicarbunazione è di subrietà energetica : « Messe à e norme di l’aeroporti, creazione di un portu di cummerciu novu in Bastia chì ùn hè micca mutatu dapoi i tempi di Napuleò u III, rimanighjata di u fondu di u golfu d’Aiacciu : hè longu u listinu è sò propiu impurtanti i vulumi finanziarii… »
Di a soma di l’isulanità…
Longu à l’intervenzione di l’attori ecunomichi, si hè trattatu assai di a questione di u creditu d’impositi investimentu, un arnese fundamentale di sviluppu chì si hè pussutu misurà à tempu i limiti è l’imperfezzione. Hè cumplessu, ancu cuntradittoriu à le volte, è raprisenta u tempu longu di pagamentu tanti inciampi per l’intraprese.
Hè statu dumandatu à a Cummissione di e lege di rende lu più simplice è più accessibule, di allargà u so campu di appiecazione, per un dettu, per a rinnuvazione di i stabilimenti usteriaghji è per i traspurtadori stradali. Volenu i raprisentanti di u BTP, primu impiegadore di l’isula ma vittime di un livellu di fallimentu mai vistu per via di a mancanza di fundiariu, ch’ellu sia sdillinatu u morsu di i regulamenti chì impiombanu i permessi di custruisce. Per l’inseme di l’attori, serà benvenutu un ritornu di a zona franca cum’è una trentina d’anni fà sott’à Alain Juppé. À chì vole sente…
Ghjustamente, attenti assai, sò pussuti pisà di modu cuncretu i membri di a Cummissione di e lege a soma di l’isulanità chì esige di i capi d’intraprese corsi ciò ch’elli ùn patenu micca i so pari in cuntinente : sopra tempu, sopra pruvista, è sopra ecchippamentu. In più di quessa, per via di a chjuculezza di l’intraprese, ùn anu micca l’ingeneria interna indispensevule per risponde à u novu modu d’accessu à i finanziamenti publichi : e chjame à prugetti.
« Hè messu u nostru ecusistema sottu à pressione da una soma di custrette, riassume Jean Dominici. Per u minimu, vedenu e nostre intraprese u so sciffru d’affari culpitu à l’altura di 7 %, vale à dì 700 milioni d’eurò di margine sane perse ogni annu. Eccu perchè ch’ella hà bisognu l’ecunumia corsa di un veru statutu fiscale è suciale », hà cunclusu u nostru presidente chì hà insistitu nant’à u caratteru vitale di obbidisce à a lege PACTE chì prevede a definizione di un mudellu cunsulariu specificu per a Corsica in leia stretta cù a Cullettività di Corsica. Nimu hè presuntu di gnurà a lege. A sanu propiu bè l’emissarii di l’Assemblea naziunale è più chè l’altri !