Si ponu paragunà à una bilancia e perspettive chì riguardanu u trafficu aereu. Trà l’attù è i svantaghji, e speme è i dubbiti, serà una storia di equilibriu. Hè attrattiva a Corsica, hè un fattu. Ma viaghja nant’à a rena mossa. Pesanu i cunflitti internaziunali nant’à u murale è i prezzi di i carburanti. Ne patenu e cunsiquenze e cumpagnie, i viaghjadori dinù per effettu di ricoccu. Da un’altra banda, hè a Corsica una distinazione di rifugiu, un territoriu marinu è muntagnolu, spidalieru per via di a ricchezza di u so patrimoniu, per via di a qualità di a so accolta è di a serenità di u so ambiente. Un’isula chì spaiseghja, è faciule di accessu. Hè stu sguardu propiu pusitivu chì hè statu purtatu da a nostra stituzione, appruntendu a stagione aerea di u 2026, chì hà pigliatu avà u so volu. L’EPCI di Corsica, cunfurtatu propiu da a cunfidenza rinnuvellata è allargata da l’uperatorii aerei, hà fattu tuttu ciò ch’ella pudia, hà previstu tuttu, anticipatu tuttu, per a riescita ecunomica ch’elli abbisognanu i so sudditi per riparte in avanti dopu à tante prove.
Sei distinazione nove
Basta à fidighjà quì i tavuloni sinottichi nant’à i ponti trà i quattru aeroporti di a Corsica è u cuntinente per fà u custattu ch’ella sà tende a Corsica i so bracci aerei nant’à l’Europa. Non solu ùn a si franca da a regula a stagione di u 2026, ma face ancu di più è assai megliu. Ùn sò piantate di dà si di rimenu e nostre squadre per allargà a reta di e cumpagnie aeree. Anu resu propiu una copia bona, megliu chè quella di nanzu : hè crisciuta l’offerta glubale in sedi, ch’ella sia per e vie naziunale o internaziunale, di 5 %. Si hè arricchita a Corsica da sei distinazione nove, si sò allargati i ranghi di l’uperatorii, digià belli zeppi, cù un arrivu novu nant’à e nostre piste : Austrian Airlines. D’altronde, à u livellu strategicu anu allungatu parechje cumpagnie u so periudu di spluttazione – da a fine di marzu fin’à u principiu di nuvembre – è à le volte ancu crisciutu e friquenze nant’à certe distinazione : Londra (EasyJet è British Airways), Ginevra (EasyJet), Zurichi (Edelweiss).
Fatta fine, ci pudemu ralegrà di vede a Corsica diventà un « porta aviò » pacificu è attrattivu in core à u Mediterraniu. In sti tempi incerti, ci hè da sperà ch’ella prufitti a stagione à l’ecunumia di a Corsica. Ciò chì ghjè sicuru, hè chì ùn hè statu negligentatu nunda per ghjunghje ci.
Estate di u 2026 : u « tavulone di bordu »
4 560 116
Hè u numeru glubale, in sedi, prupostu per a stagione. Hè crisciutu in media di 5 % di pettu à u 2025 (231 000 sedi in più). Sò in prugressione inde a so prugrammazione i quattru aeroporti di l’isula.
81 036
Hè l’offerta in sedi per e distinazione nove, à u numeru di sei : Dole (Air Corsica), Munich (Air Corsica), Vienne (Air Corsica et Austrian Airlines), Rennes (Air Corsica è Transavia), Limoges (Volotea) è Caen (Air France)
134
Hè u numeru glubale di linee (88 naziunale è 46 internaziunale)
17
Hè u numeru tutale di cumpagnie chì anu a Corsica cum’è distinazione, frà e quale una nova : Austrian Airlines
12
Hè u numeru di paesi cullegati : Inglitterra, Belgica, Svizzera, Alimagna, Lussemburgu, Italia, Paesi Bassi, Suede, Danimarca, Austria è Maroccu.
