Riforma cunsularia
Qualessa sia a lungura di u caminu, ciò chì conta hè a distinazione. Ci averanu purtatu sei annate longhe suminate à trampali à sta ghjurnata decisiva di stu luni u 2 di ghjugnu. Ùn era ancu propiu a linea d’arrivu u Palazzu di u Lussemburgu ma una ultima girata neguziata cum’ellu ci vole : hè à l’unanimità ch’ellu hà aderitu u Senatu à a creazione di u Stabilimentu publicu di u Cummerciu è di l’Industria inde u perimetru di a Cullettività di Corsica.
S’ella piglia listessa via l’Assemblea naziunale vutendu dinù ella u prugettu di lege cum’ellu hè – un scenariu chì si pò imaginà propiu – si hà da girà di modu definitivu una pagina di a storia di a CCI di Corsica. Ma a storia, hè sempre un ricumenciamentu eternu…
« Risponde à specificità uniche in Francia »
Hà tenutu François Rebsamen l’ingagiamentu ch’ellu avia pigliatu à u Palazzu cunsulariu di Bastia mentre a so prima visita ufficiale in Corsica, di ferraghju scorsu, quellu di apre a porta parlamentaria per fà ci entre u prugettu di lege rilativu à a riforma istituziunale di a camera.
Hè statu u primu à cullà à a tribuna di u Senatu u ministru di l’Accunciamentu di u territoriu è di a Decentralisazione per difende u so testu « vutatu à l’unanimità da l’Assemblea di Corsica, equilibriatu, securizatu à u livellu ghjuridicu è chì risponde à specificità lucale uniche in Francia. »
Li hà cunferitu a validazione di u Cunsigliu di Statu tutta a so legittimità. Hà purtatu cù soni è trumpette François Rebsamen un argumentu chì li hà permessu di cullegà i senatori à a so causa : u futuru stabilimentu publicu, chì hà vucazione à ripiglià e missione, l’attribuzione, l’acquisti è e risorze umane di a CCI di Corsica di modu integrale, hà da guarantisce a maestria publica di a gestione di i porti è di l’aeroporti di l’isula.
Serà assicurata a so guvernanza di manera cunghjunta da i raprisentanti di a Cullettività di Corsica è di i sucio prufessiunali. Hè stata aduprata listessa dialettica cù briu da Olivia Richard, a rappurtadrice di a Cummissione di e lege : « A maestria di i trasporti, cum’è quella di u turisimu o di l’impurtazione, sò sinonimi di libertà per a Corsica ! »
Dopu à u ministru, hà difesu l’amendamenti arrecati à u testu chì sò stati, dinù elli, validati à l’unanimità : rivene di dirittu a presidenza di u stabilimentu publicu à u presidente es-qualità di u Cunsigliu esecutivu di Corsica ; sedenu i presidenti di l’agenzie è di l’uffizii à u so cunsigliu d’amministrazione.
Ci seranu dinù raprisentati duvutamente i persunali cù un votu cunsultativu. « Un prucedimentu longu ma un cunsensu largu », hà riassuntu a senatrice, di a quale hè stata salutata è ricunnisciuta in sianza publica a spertizia apprufundita di u testu, chì si era digià vista in cummissione.
« Un prugettu aspettatu, cunsensuale è beneficu »
Si hè pussutu misurà u cunsensu per via di e sfarente intervenzione. Hà stimatu a senatrice verde Mélanie Vogel ch’ellu era « urgente è necessariu » u trasferimentu, cunsiderendu lu cum’è qualchì picculu stulettu nant’à a strada di l’autunumia ch’ella chjama cù unepochi d’auguri : « À a Republica, li tocca à evuluà è à sorte da a pulitica di i picculi passi. »
Per u senatore sucialistu Éric Kerrouche, hè a riforma « una scelta pulitica forte per premunì si di pettu à a privatisazione di u trasportu in Corsica. » À nome di u gruppu ecumenicu di l’Independenti, ci vede Vanina Paoli-Gagin « una petra arrecata à l’edifiziu di u rinnovu ecunomicu di l’isula. » Porta voce di u gruppu Rassemblement des démocrates et progressistes, hè propiu furmale Marie-Laure Phinera-Horth : « Hè un prugettu aspettatu, cunsensuale è beneficu. »
Si sò raghjunti i dui senatori corsi, Jean-Jacques Panunzi, apparentatu cù i LR, è Paulu Santu Parigi, autunumistu membru di u gruppu di l’Unione centrista. Per u primu, hè un « puntu cardinale » a gestione publica di i porti è di l’aeroporti. Cum’è inde u tradiziunale Chjama è rispondi, difende u secondu un prugettu chì, rispechjendu a « maturità di l’eletti di a Corsica », serà messu in ballu « inde a trasparenza è a sinergia custruttiva à u serviziu di l’ecunumia. »
Hà mutivatu solu a senatrice cumunista Marie-Claude Varaillas a so astinzione per via di a scelta di u mudellu ghjuridicu ch’ella stima « vulnerabile. »
In fine, mancu un votu contru. Serà statu qualchì sullevu per Gilles Simeoni, Nanette Maupertuis è Jean Dominici chì si eranu spiazzati tutti per l’uccasione. Si face strada oramai ver’di u Palazzu Bourbon…
Article paru dans La Lettre N° 55