À u primu pianu di ste qualità, si trova di sicuru a so sudezza à u livellu finanziariu, chì si face vede, frà altri sciffri propiu significativi, cù a so capacità di auto finanziamentu, chì trapassa tutti l’anni i 13 milioni d’eurò, u riportu torna una volta pusitivu di u bilanciu di chjusura di 43 milioni d’eurò, è i capitali proprii chì si alzanu, à u 31 di dicembre di u 2025, à 102,5 milioni d’eurò.
Hà fattu dinù a dimustrazione a CCI di una rubustezza vera, fendu fronte abbastanza prestu – è senza nisunu aiutu direttu – à l’impattu forte di a crisa sanitaria di u COVID chì, mentre dui esercizii, hà riduttu assai assai a so capacità à manuvrà. Una prova chì hè stata trapassata per via di u travagliu di l’inseme di e squadre, impegnate assai inde stu cumbattu per u ritornu à l’equilibriu, chì ci vulia à mette in ballu da ch’ellu pudessi cuntinuà u stabilimentu à riempie e so missione cum’ellu ci vole.
L’usu bonu di i fondi proprii
Cinqu’anni dopu, u doppiu custattu chì s’impone hè, d’una banda, ch’ella hè stata vinta sta sfida, è da l’altra banda, ch’ellu hà sappiutu, una volta francatu st’inciampu da e so primure, ritruvà una vitezza bella superiore à quella detta « di crucera. » Ne testimunieghja u so prugramma d’investimentu per u 2025, superiore à 21 milioni d’eurò. Una dinamica chì face dì à u Presidente Gilles Simeoni « chì ùn si tratta micca di ricuperà i fondi ricevuti in lascita per d’altri scopi chè quellu di megliurà e nostre infrastrutture portuarie è aeroportuarie. Ciò chì serebbe statu di poca primura per un stabilimentu privatu chì, s’ellu ne avia avutu a gestione, averebbe pensatu nanzituttu à e dividende à rinverscià à i so azziunarii. »
Un bugettu messu in ballu è i conti anninchi di u 2025 validati da a cummissione di e finanze, po à l’unanimità da tutti l’amministradori dopu à esse stati certificati da u cullegiu di i cummissarii à i conti.
A qualità di l’azzione di a CCI ricunnisciuta da i so sudditi
Cummandata da CCI France à OpinionWay, hà messu torna una volta à l’onore u nostru stabilimentu l’ultima inchiesta indipendante di perfurmanza, hè statu nutatu propiu bè per e so azzione in u 2025.
Cunsidereghjanu tandu 83 % di i capi d’intraprese accumpagnati ch’ellu hà avutu un impattu forte l’aiutu purtatu da a CCI di Corsica, vale à dì assai sopra à i 65 % di a media naziunale, frà i quali 31 % stimanu ch’ellu hè statu assai forte l’impattu, contru à 14 % per a media naziunale.
Messa in ballu trà u 9 di ferraghju è u 20 di maghju scorsi (purtendu di fatti nant’à l’eserciziu 2025), st’inchiesta fatta nant’à una mostra raprisentativa di l’intraprese chì anu benefiziatu di un accumpagnamentu da a parte di a CCI di Corsica, li hà permessu di buscà si una bunissima nota glubale di 8,8 nant’à 10.
Una suddisfazione per i so sudditi chì porta in particulare nant’à a qualità di a so rilazione cù l’interlocutori di a CCI, a rapidezza di a presa in carica è a qualità di l’infurmazione o di e prestazione arrecate (9/10 nant’à sti trè criterii).
D’altronde, hà messu à palesu st’inchiesta ch’ellu avia purtatu nanzituttu l’accumpagnamentu di l’intraprese corse per u 2025 nant’à a trasfurmazione numerica (43 % contru à 15 % à u livellu naziunale) è ch’elle avianu vistu u so sciffru d’affari cresce 31 % di l’intraprese interrugate, contru à 23 % à u livellu naziunale.
Fatta fine, cunsidereghjanu 84 % di i capi d’intrapresa corsi accumpagnati ch’ella hè stata utule a CCI di Corsica.
