« Sò venuta à ascultà è à vede cumu puderiamu, inseme, strutturà megliu l’ecunumia, chì al di là di u prucedimentu istituziunale, aghju a primura di u cutidianu di i Corsi. »
Catherine Vautrin, ministra di u Partinariatu cù i territorii è di a Decentralisazione.
Di sicuru, mantene l’evuluzione istituziunale di a Corsica u so statutu di scopu finale, ma a vita di ogni ghjornu di i Corsi è, in cunsiquenza, tutte e parte è tutti l’aspetti di l’ecunumia voltanu à l’avanti scena. Eccu u spiritu cù u quale hà scambiatu Catherine Vautrin, ghjovi u 24 di ottobre, à u palazzu cunsulariu di Bastia – per a prima di e trè ghjurnate di a so visita ufficiale inde l’isula – cù l’attori sucio ecunomichi è i sudditi di a CCI di Corsica. Parolle schjette, franche è dirette, un ascoltu attentu, è l’ingagiamentu di fidighjà di più vicinu torna l’attese forte è precise chì sò state sprimate.
Favurevule à a maestria publica di i porti è di l’aeroporti
Per u presidente Dominici, hè una figura casana Catherine Vautrin, chì ùn hè mancu appena spaisata quand’ella franca u zogliu di una camera di cummerciu. A cunsidereghja ancu cum’è una sorte di cummare. Quindeci anni fà, incù a so qualità di rapurtadrice di a Cummissione di l’affari ecunomichi, hà avutu un rollu propiu decisivu per a mudernisazione di e stituzione cunsularie, un preludiu per a Corsica à a creazione di una entità regiunale sola, dedicata sana sana à l’interessu generale : « Hè a CCI di Corsica una istituzione trasparente, unurevule è perfurmante à u serviziu di a Corsica è di i Corsi. Vole cuntinuà e so missione è custruisce, cù u vostru sustegnu, l’avvene ecunomicu di l’isula, cù unepoche di evuluzione indispensevule in quantu à a fiscalità, in quantu à e riforme è in quantu à i prugetti d’investimenti strutturanti. A nostra misura maestra hè quella di u Creditu d’impositu Investimentu per a Corsica, chì hà fattu vede a so efficacità dapoi anni è anni è chì dumanda solu à esse megliuratu… »
Si hè ralegratu in fine Jean Dominici ch’ellu sia oramai integratu u mondu ecunomicu corsu inde a ripresa di e discussione nant’à u prugettu d’autunumia inde u quale hè achjusa a quistione priuritaria di u trasferimentu di a camera à a Cullettività di Corsica. »
« Ùn sò micca venuta à dà e lezziò, sò venuta à ascultà è à vede cumu puderiamu, inseme, strutturà megliu l’ecunumia, chì al di là di u prucedimentu istituziunale, aghju a primura di u cutidianu di i Corsi. » Scrivendu si inde stu solcu, dice d’avè capitu propiu Catherine Vautrin l’urgenza à arregulà a quistione di a maestria publica di i porti è di l’aeroporti, è pare di fatti di rallegà si cù a suluzione legislativa prevista dapoi u 2019, per via di l’articulu 46 di a Lege PACTE, inde a matrice territuriale, puru s’ellu ci vulerà à tramandà, per qualchì mese, e cuncessione oghjinche di a CCI. Averianu da seguità subbitu dopu e prime reunione di travagliu…
Travaglià nant’à e pruposte di a CCI di Corsica
Jean-Charles Martinelli, difendidore è capimachja di l’artisgiani, Karina Goffi, porta voce di i prufessiunali di u turisimu, Joseph Benzoni, à nome di i traspurtadori stradali, Jean-Louis Albertini, presidente di u MEDEF, Dominique Antoniotti è Corinne Bernardini, puntelli federali di u BTP, anu discrittu ciò chì ùn andava micca inde i so settori proprii è ciò ch’elli aspettavanu di i puteri publichi per sustene li. Hà pigliatu a ministra, attenta propiu à ciò ch’elli avianu da sprime i so interlocutori in suffrenza, a resuluzione di studià e dumande cù u sguardu di a so funzione, quellu di una partinaria à l’intuttu di i territorii.
Nant’à a fiscalità in generale è u Creditu d’impositu Investimentu Corsica in particulare, indetta una valutazione, sullicitendu u so cullega di Bercy, Antoine Armand, nanzu di circà à fà una evuluzione. Hà da studià, nondimenu, a pussibilità di stende lu à a rinnuvazione è à a transizione energetica di i stabilimenti usteriaghji, malgradu e direttive europee. Trattendu si di a custruzzione di l’alloghji è di a liberazione di u fundariu, chì và di paghju, avanta piuttostu un’ammullita di i regulamenti, chì s’assumiglia à qualchì labirintu in Corsica, inde u listessu filu chè ciò ch’ellu hà dettu u Primu ministru à a tribuna di l’Assemblea naziunale mentre a so dischjarazione di pulitica generale. In fine, si hè ingagiata à esaminà da vicinu vicinu e pruposte di a CCI di Corsica « per vede in chì misura si puderà travaglià di manera benefica nant’à certe di ste misure… »
Catherine Vautrin, intusiasmata da u prugettu d’apertura, per a rientrata di u 2025, di a Scola di u Turisimu, di l’Ospidalità è di l’Evenimenziale à u Palazzu di i Cungressi d’Aiacciu – induv’ella assistia u lindumane à u cungressu di i merri è di i presidenti d’EPCI di u Pumonte – si hè mustrata propiu cumprensiva ma, di sicuru, prudente è prammatica.
Pour lire la version française, cliquez ici
Article paru dans La Lettre n°48