A Lettera | Partinarii adduniti per purtà risposte cuncrete à l’imprese corse

Durante una ghjurnata dedicata à i prufessiunali, tutti l'attori ecunomichi, l'urganisazione prufessiunale, ma dinù e stituzione, l'urganisimi finanziarii, i servizii di u Statu è di a Cullettività di Corsica si sò adduniti per risponde à e so dumande. Tanti interlocutori riuniti per l'uccasione in un stessu locu : u Palazzu di i Cungressi d'Aiacciu.

Una prova trasfurmata in successu. Hà permessu a prima edizione di a Grande ghjurnata di i prufessiunali à i capi d’imprese, ma dinù à l’artisgiani è à i cummercianti, di avè risposte cuncrete à e difficultà ch’elli scontranu di modu regulare. Era propiu quellu u scopu di sta manifestazione, chì hè chjamata oramai à esse urganizata torna ogni annu.

Un stand = un interlocutore

Per fà chì issi attori ecunomichi fussinu cunvinti da l’iniziativa è rispondessinu di fatti à l’invitu, ci vulia à assicurà li di pudè, in una sola volta, fà micca solu dui… ma parechji affari in u spaziu di qualchì ora.

Cusì, i stand riuniti sottu à un listessu tettu, in core à a cità imperiale, custituianu tanti punti di cuntattu induve sti prufessiunali sò pussuti truvà risposte à e so dumande nant’à temi assai varii, cum’è a regulazione (in particulare fiscale), i finanziamenti, a securità, a transizione eculogica, u ricrutamentu o ancu i dispusitivi destinati à riduce i svantaghji cagiunati da l’insularità. Senza scurdà si di a trasmissione, un tema sceltu per esse trattatu in modu particulare (da vede inde u quadru).

Nunda serà megliu, hè vera, chè u cuntattu direttu per francà si di difficultà supplementarie in u cumpiimentu di e prucedure amministrative, digià abbastanza cumplesse !

Dopu à i tradiziunali discorsi d’apertura di l’urganizatori è di i principali partenarii di sta manifestazione (1), i capi d’imprese sò dunque pussuti, à a fine di i so scambii cù l’interlocutori adatti, fà torna una volta u custattu chì a rilazione umana ferma a via più efficace per gestisce una situazione cumplessa… ancu s’è l’intelligenza artifiziale permette oghje ghjornu di capisce megliu i labirinti di i regulamenti. 

A prima à u « bon cunsigliu »

Hè propiu di un’ascolta attenta à tutte e so dumande ch’elli anu prufittatu l’attori ecunomichi ghjunti à circà un accumpagnamentu persunalizatu, u solu capace di facilità a risuluzione di e so difficultà amministrative.

« Hè propiu in stu duminiu chì avemu u più bisognu di esse sustenuti. Un bon cunsigliu, ottenutu in i più brevi termini, pò esse più benefiziu per a mo impresa chè una suvvenzione, chì ùn feria chè rimandà à più tardi l’affruntamentu di un ostaculu maiò chì si prisenterà nant’à a so strada, s’e ùn aghju micca trovu a suluzione à un prublema specificu. »

Stu cummentu di un artisgianu traduce perfettamente l’attese ch’ellu avia, è testimunieghja di u fundamentu di a dimarchja d’accumpagnamentu detta « andà versu », chì hà purtatu à l’urganizazione di sta ghjurnata, mettendu in primu pianu a nuzione essenziale di vicinanza.

A trasmissione, una sfida maiò

Sapendu chì guasi 2 000 imprese isulane sò dirette da un omu o una donna di più di 60 anni, ùn si puderà nigà ch’ella hè a quistione di a trasmissione di prima trinca per priservà l’attività sviluppata longu à una vita sana, o ancu nant’à parechje generazione.

Serà ancu più veru per a sopravvivenza di e piccule strutture, largamente maiuritarie in Corsica, chì cundiziuneghja micca solu u salvamentu d’impieghi preziosi, ma dinù a cunservazione di sapè fà antichi è di servizii di vicinanza indispensevuli in l’ambiu rurale.

Tandu, à quale si puderà cunfidà a ripresa di ste imprese ch’ùn si deve micca lascià smarrisce ? Quandu li tocca à intervene ? In chì cundizione ? Cumu urganizà la ? Versu chì servizii è urganisimi ci vole à vultà si per appruntà la ?

Hà permessu a tavula rotonda urganizata nant’à sta tematica di trattà ste dumande numerose, postu chì eranu riuniti i raprisentanti di parechji ordini prufessiunali (avucati, nutari, sperti cuntabili), è ancu l’attori istituziunali (EPCI di Corsica, ADEC, MEDEF, servizii di u Statu), chì ponu cuntribuisce à l’accumpagnamentu di i capi d’imprese candidati à a trasmissione di a so attività, ch’ella sia in u quadru famigliale o fora di questu, à favore di novi ripigliadori.


(1) Jean Dominici per l’EPCI di Corsica, Karina Goffi per u Cullittivu (associu cullegiale di l’Ordini è di l’Urganisazioni Cunsulari, Prufessiunali è Patrunali di Corsica), Jean-Félix Acquaviva per a Cullettività di Corsica, Christelle Combette per a CAPA, Aurélie Rossignol per Corse-Matin è u prefettu di Corsica, Éric Jalon.

À lire également

A Lettera | Partinarii adduniti per purtà risposte cuncrete à l’imprese corse
Durante una ghjurnata dedicata à i prufessiunali, tutti l'attori ecunomichi, l'urganisazione prufessiunale, ma dinù e stituzione, l'urganisimi finanziarii, i servizii di u Statu è di a Cullettività di Corsica si
Intempéries en Corse-du-Sud : une cellule d’appui pour accompagner les entreprises sinistrées
Après les intempéries des 5 et 6 novembre, une cellule d’appui accompagne les entreprises de Corse-du-Sud touchées dans leurs démarches et leur reprise d’activité.
Gestionnaire marchés publics (H/F)
La Nuit de l’Orientation 2026 : rendez-vous le 24 novembre à Bastia et Ajaccio
La Nuit de l’Orientation revient le 24 novembre 2026 à Bastia et Ajaccio : métiers, formations, rencontres et conseils pour construire son avenir professionnel.
La Lettre n°70 – Novembre 2026
La Lettre de novembre 2026 met en lumière les actions de l’EPCI de Corse en faveur de l’accompagnement des entreprises, de la formation, de l’ouverture à l’international et de l’attractivité
La Lettre | L’EPCI de Corse en éclaireur de la saison 2027