Dopu à u so lanciu, hà fattu alzà si in volu u Stabilimentu publicu di u Cummerciu è di l’Industria di Corsica un lugiziale novu novu, accessibule di gratisi è scarichevule nant’à u so smartfonu o nant’à a so tavuletta numerica.
Basta à pichjà « Aeroporti di Corsica » inde a luppa di ricerca di App Store è di Android, a buttega digitale di l’appiecazione numeriche, è di vede affaccà l’icona in qualchì seconda solu (l’elegante mezu chjerchju discioltu custituitu da raghji turchini cum’è u celu) nant’à u so screnu.
I Corsi chì si spiazzanu inde l’aria, di modu regulare o puru à l’uccasione, è ancu l’inseme di i viaghjadori chì venenu à passà si una stonda nant’à u nostru territoriu in ogni stagione, si vedenu rigalà un serviziu ghjuvatoghju, praticu efficace, chì si pò prezzà u caratteru duttile è ludicu. Per via di un tavulone di bordu, di grande visibilità, dà accessu l’appiecazione à un pannellu d’infurmazione chì hà da facilità a vita di l’avventori di l’avviò, nanzu, mentre è puru dopu à u volu, qualessa sia a cumpagnia è a distinazione.
Infurmà si nant’à i voli è seguità li in diretta
Acconcia a pagina d’accolta, di modu simultaneu, e quattru fiure di e nostre piattaforme aeroportuarie, ciò chì li arreca subbitu una cuerenza regiunale. Ognuna hè attrazzata cù una web cam, è si pò di fatti fidighjà li in diretta. Basta dopu à navigà trà l’una è l’altra, secondu i so centri d’interessi proprii, per avè un pannellu sinotticu è interrativu di e linee, e distinazione di u serviziu publicu ma dinù tutte l’altre, cù u Cuntinente è u strangeru, chì sò cullegate cù a Corsica.
Quellu chì si ne ghjova hè infurmatu subbitu subbitu di i voli di a ghjurnata, di u nome di e cumpagnie è di i so codici alfanumerichi, di l’urarii di partenza è di arrivu, di l’apertura di l’arregistramentu, di u numeru di i banchi induve si pò fà e dimarchje è puru di quellu di a porta d’accessu insegnata.
Unu di i vantaghji serà di sapè chì u volu chì ci interessa si hè alzatu in volu è s’ellu si pò vene à circà qualchissia à l’aeroportu, s’ellu hè statu in ritardu è qualessa hè a previsione di u so atterrimentu, vale à dì, in corte parolle, tutti i rinsignamenti pertinenti chì permettenu d’urganizà per u megliu u so spartitempu.
S’è, per un dettu, hè partutu un apparechju da Parigi-Orly per ghjunghje in Calvi, serà pussibule di vede a prugressione di l’avviò in tempu reale : quandu omu hè nant’à a pagina specifica di a traversata, si attiva l’unghjetta Volu in diretta è si ghjunghje pestu nant’à Flightradar 24, l’appiecazione ideale per seguità passu à passu u traghjettu nant’à a carta geugrafica. Di modu più generale, permette di pistà tutti l’avviò civili, ancu l’elicotteri, chì sò in volu o chì sò per alzà si in volu o atterrà. Cum’è l’indetta u so nome, hè dispunibule u serviziu Flightradar 24 24 ore nant’à 24 è 7 ghjorni nant’à 7.
Una piattaforma d’infurmazione utile
Sò stati cunfigurati parechji altri servizii nant’à l’appiecazione di l’EPCI di Corsica. Hè pussibule di circà una distinazione in particulare à un periudu definitu : basta à scrive la inde a luppa Ricerca è si buscanu tutte e pussibilità chì sò offerte da e cumpagnie. Per un dettu : si vole almanaccà una dumenicata in Roma à u mese d’aprile, è ci si piglia subbitu subbitu u calendariu di i voli à a partenza di l’aeroporti corsi chì culleganu a capitale taliana.
Ci hè una rubrica chì permette di accede à l’offerte di staziunamentu nant’à e sfarente aere di Aiacciu, di Figari, di Bastia è di Calvi. Ognunu ci hè menziunata cum’ellu ci vole è dà ancu l’appiecazione a pussibilità di simulà a durata di u so parcheghju per buscà si tutti i tariffi è ciò chì hà da custà secondu u parcheghju chì ghjè sceltu.
Si sbuscina d’altronde a panuplia di i servizii per rinsignà si nant’à a reta di e distinazione partendu da a Corsica ; i cuntatti aeroportuarii ghjuvatoghji (indirizzi elettronichi, telefoni, ecc.) ; e riclamazione cù a pussibilità di scaricà i furmularii adattati è puru per i bagagli ; pò aiutà a rubrica di l’ogetti trovi à ritruvà u so portafogliu o e so chjave di vittura perse o chì sò state scurdate à l’aeroportu o mentru un volu : l’infurmazione in leia cù i trasporti, i tassì, e vitture di lucazione, i carri, ecc.
Da l’idea d’iniziu fin’à a messa in linea, l’appiecazione di l’« Aeroporti di Corsica », di gratisi è micca mercante, hè stata pensata, creata è cuncipita à u livellu grafficu in internu da e squadre – allargate – di e nostre direzzione Infurmatiche, è Cummunicazione di l’aeroporti di Corsica. Un travagliu cullettivu, fine è intelligente, chì risponde à tuttu ciò ch’ellu pò aspettà u viaghjadore, ch’ellu sia d’affari o di turisimu, di un serviziu simule è al di là. Hè propiu una fierezza.
