Inde l’effemeride storicu di a Corsica, averà per u sempre a ghjurnata di u mercuri u 26 di nuvembre di u 2025 una piazza particulare. Nata à a fonte battesimale, l’EHM, a Scola Usteriaghja di u Mediterraniu, si stalla à longu andà inde u paisaghju ecunomicu di a Corsica. Si sperava dapoi anni è anni, à spessu à l’orlu di sbuccà, po lasciata da parte à l’ultimu.
Ciò chì generazione d’eletti è di prufeziunali anu sunniatu, a CCI di Corsica è a Camera regiunale di i Mistieri è di l’Artisgianatu, l’anu fatta per via di Amparà Mediterraniu, a so piattaforma di furmazione cumuna, cù l’incuragimenti è u sustegnu finanziariu di u Statu è di a Cullettività di Corsica. Anu arrecatu a so petra finanziaria d’altri partinarii, u Circondu Aiaccinu in testa. Hè albergata sta scola, dedicata à a furmazione di u persunale qualificatu per e filiere di un turisimu duraticciu, da u Palazzu di i Cungressi d’Aiacciu, chì campa ellu stessu a so rivuluzione propria, cù venti marini novi è favurevuli.
Inde un ambiu festosu, si hè buscatu l’EHM un cumpare famosu, Thierry Marx, u presidente naziunale di l’UMIH, è capi cucinaru stellatu di prima trinca. Hè ghjuvata a so stella – a so stella di grazia – da guida per l’amparanti è l’elevi di a prima prumuzione chì anu appruntatu è servutu u rompi dighjunu inde u risturante panuramicu novu novu, un « toccu » di rispastu cum’elli dicenu i giovani aiaccini, sottu à a direzzione di Emmanuel Lojou.
Li hà dettu Thierry Marx ch’elli venianu circà assai di più chè un diploma : un prugettu. Un prugettu di vita. Eccu perchè ch’ella ùn hè micca solu l’EHM una infrastruttura pruvidenziale chì vene di culmà un viotu tamantu inde u settore maiò di l’ecunumia di a Corsica. Hè un ponte versu l’avvene chì attraversa u Mediterraniu è, si spera, va assai al di là…
Causa cumuna !
E figure chjave chì anu purtatu cù successu u prugramma di furmazione à u portu purtavanu visi raggianti, illuminati da l’intensa suddisfazione di un sforzu utile è di un duvere compiu. Mercuri, u 26 di nuvembre, hè statu un ghjornu preziosu di realizazione, un raghju di sole in u celu scuru di difficultà è incertezze, un trampolinu di lanciu pruvidenziale per a ghjuventù corsa. In u so discorsu, si hè alluntanatu Jean Dominici da u protocolu abituale impostu da una ceremonia tale.
Sò state scelte cù cura e so parolle. U presidente di a Camera di Cummerciu è d’Industria (CCI) di Corsica hà salutatu tutti quelli – u Statu, l’auturità lucale, i sperti, l’istituzione publiche è l’associi prufeziunali – chì anu unitu e so forze per permette à a Corsica di arrimbà si à a so identità è di prughjettà si nantu à a scena mundiale. « In un tempu cortu cortu, avemu custruitu un marcatore territuriale, un puntu di riferimentu, un simbulu d’unità è di prugressu. » Una scola chì hà da cambià l’avvene è scrive un’antra storia à i mistieri troppu spessu
discreditate, chjamate à diventà, grazia à un cursus di prima trinca, incù e scole rinumate di Savignac è Avignone, mistieri d’emuzione è di cunnessione umana. U turismu ùn hè più vistu cum’è un male necessariu per a nostra ecunumia, ma cum’è un veiculu per u nostru sensu di l’ospitalità, a nostra cultura, u nostru sapè fà artigianale, una vetrina per a nostra arte di campà, di accoglie è di sparte.
Un locu di cullegamentu
Al di là di i ringraziamenti calorosi davanti à un publicu di cinque centu invitati per u so impegnu è a so influenza in i campi di u turismu, di a pruduzzione è di a gestione d’evenimenti, hà trasmessu Jean Dominici un missaghju federatore. A Scola Usteriaghja di u Mediterraniu piglia a so forza inde un ecusistema unicu chì si pò spannà solu per via di una dinamica cullettiva, un’unione sacra.
« Ùn hè micca un locu scantatu ma u batticore di un puntellu maiò di l’ecunumia, un locu induv’ellu s’ampara, induv’ellu si crea, induv’ellu s’innova, induv’ellu si cullabureghja. » Ùn hè micca stata cuncipita per marchjà nant’à i passi di l’altri attori storichi o oghjinchi, di a furmazione. À u cuntrariu, serà, inde u spiritu di u presidente, un locu di cunvergenza, un locu di cullegamentu.
« Dapoi anni è anni, anu tenutu u so rangu i licei usteriaghji, CFA, AFPA, urganisimi di a furmazione prufeziunale, à le volte inde e cundizione difficiule ma sempre cù passione. Anu oghje ghjornu e generazione ch’elli anu furmatu a riputazione di a nostra ospitalità. Li vogliu dì quì chì a nostra scola hà vucazione à cuntinuà à travaglià è à prugressà inseme. » Per Gilles Simeoni, hè sta scola un attu di fede inde l’avvene. Per Thierry Marx, una scelta pulitica per prutege un’identità, una cultura, un patrimoniu.
Tamanta ghjurnata ! Un rompu dighjunu inaugurale di prima trinca per l’entrata, parolle d’avvene, putente è federatrice, per u piattu principale, è u gruppu Eppò per fà da dulciume. Cum’ellu si deve, hà esaltatu stu mercuri u 26 di nuvembre i sapori è l’emuzione di una carta gastronomica…
Lire La Lettre N°60