Si sò fatti i dui primi scontri d’infurmazione cù l’Ordini è l’urganisazione cunsularie prufeziunale è patrunale i 23 è 24 di ottobre scorsi in Bastia è in Aiacciu. Dopu à l’invitu di e Finanze publiche, sò state prisentate duie piattaforme di dimaterialisazione di e fatture, in particulare da a sucetà Zeendoc, da pudè illustrà di modu cuncretu u pannellu di e suluzione adattate dispunibule à distinazione di l’intraprese.
Di sicuru, ùn si hà da piantà in cusì bona via a campagna di infurmazione. L’attraccu tecnicu è prammaticu di a e-fattura, chì serà ubligatoria subbitu subbitu l’annu chì vene, serà l’ogettu di reunione, d’attelli è di webinarii à parte si da u primu trimestru di u 2026. « Simu propiu cunvinti di esse riesciuti à sensibilizà i sfarenti attori sucio prufeziunali nant’à a riforma, ma l’imbusca principale hè avà di tuccà e TPE di u territoriu è l’anu da permette di sicuru i webinarii chì seguiteranu », predisce u direttore regiunale di e Finanze publiche, François Martin.
L’inventariu di i vantaghji
Per via di sta riforma, incù una uperazione sola, ponu mandà l’intraprese a fattura à u so cliente qualessa sia a so dimensione, alimentà di modu automaticu a so cuntabilità è trasmette di modu direttu i dati necessarii à l’amministrazione fiscale. Eccu i quattru benefizii principali di a riforma :
- Rinfurzà a cumpetittività di l’intraprese per via di i guadagni di a dimaterialisazione chì hà da permette di autumatizà certe tacche, avendu di più facilità per u travagliu di gestione di e fatture. Arreca a fatturazione elettronica un guadagnu di pruduttività per via di a diminuzione di u tempu di trattamentu di e fatture : suppressione di a stampittera è di fatti di i sbaglii putenziali, diminuzione di u tempu passatu per i rilancii, reduzzione di u numeru di e fatture perse, fatture di più omegenie per via di a so standardisazione. In fine, un costu di emissione è di ricezzione di e fatture chì serà bellu inferiore è un tempu preziozu chì serà vintu per d’altre faccende.
- Simplificà, à longu andà, l’ubligazione dichjarative di l’intraprese circhendu à sviluppà una offerta nova di servizii : u pre-riempiimentu di e dichjarazione di TVA. Si scrive st’offerta nova di manera più glubale inde a simplificazione di e dimarchje amministrative di l’intraprese, vulsute da Bercy, puru s’ella ùn… simplificheghja micca l’affare l’istabilità pulitica.
- Luttà megliu contru à a froda à a TVA, à u benefiziu di l’uperatorii di fiducia : permette a fatturazione elettronica di più equità è di più ghjustizia fiscale trà l’intraprese, per via di un signalamentu di e frode, favurizendu di fatti una cuncurrenza di più leale.
- Megliurà a cunniscenza in tempu reale di l’attività di l’intraprese. Rendenu più faciule a pilutera di l’ecunumia da a putenza publica a dispunibilità è a sfruttera di i dati buscati di modu automaticu. Arrecanu e ricullate d’infurmazione di fatturazione una visibilità in tempu reale di a cunghjuntura ecunomica, in particulare per ogni settore d’attività.