Inde un territoriu isulanu induv’ellu hè fundamentale u trasportu aereu per tutti i settori – a mobilità, a salute, l’ecunumia – a sicurezza di i quattru aeroporti internaziunali hè una priurità assuluta. Abbisogna una forza di travagliu prufessiunale altamente qualificata cù una grande cumpetenza è un sistema logisticu adattatu è efficiente chì rispetta propiu e norme europee rigurose per prutege in modu ottimale i passageri, i bagagli è l’aviò contr’à l’atti malvaghji è e minacce deliberate, ch’ella sia in terra o puru in aria.
Anu mudernizatu Bastia è Calvi i so attrazzi di sicurezza aeroportuarii. Aiacciu hè in corsu di rinnuvamentu, è Figari avanza ancu bè. Daretu à st’investimenti, si anu da truvà attrazzi di detezzione di più efficienti, è ancu bastimenti rinnuvati, custruzzione nove, spazii novi è una migliore urganizazione di u travagliu per l’inseme di e squadre.
Attrazzi di detezzione di l’ultima generazione
Bastia-Poretta avia anticipatu l’ultimi regulamenti di sicurezza digià in u 2022, cunfigurendu i so lucali per appruntà si currettamente à a transizione à u standard 3 di l’EDS (Attrazzi di Detezzione di Splusivi) chì, grazia à una vera prudezza tecnologica, permette un’analisi automatica di più prufonda di i bagagli di a stiva.
À l’epica, a Camera di u Cummerciu è d’Industria di a Corsica (CCI) avia ingagiatu, cù u sustegnu di u Statu, un bugettu di 6,4 milioni d’eurò, una somma chì cupria tuttu u circuitu necessariu per u cuntrollu di i bagagli prima ch’elli sianu caricati nantu à l’aviò : mascine di detezzione, sistema di classificazione è di avviamentu è ancu l’adattazione topologica di u bastimentu.
In Calvi Santa Catalina, hè entrutu in serviziu stu novu sistema di cuntrollu di i bagagli registrati u 21 di ferraghju di u 2024. Cusì hà apertu a piattaforma di a Balagna una strada in Corsica per tirà u solcu di l’EDS standard 3. Ancu quì, a so integrazione hà necessitatu un travagliu impurtante per a so inserzione in cundizione ottimale : riqualificazione di u bastimentu di trasportu, creazione di una sala tecnica, rinfurzamentu di e strutture è mudificazione di u parcorsu di i tappetti per i bagagli.
Trattendu si di l’aeroportu d’Aiacciu – da vede i ditagli in e pagine chì seguitanu – i dui apparechji EDS 3 sò stati messi in serviziu à l’iniziu di u 2024 in una cunfigurazione pruvisoria. Ma un novu bastimentu hè oghje ghjornu in custruzzione in u situ per accoglie, in un centru dedicatu, tutte e funzione rilative à a sicurezza (ispezzione di i bagagli di a stiva, di i passageri è di i so bagagli di cabina, è ancu di u persunale è di i veiculi).
Un finanziamentu di 16,3 milioni d’eurò accumpagna sta creazione à grande scala chì hà benefiziatu di un sustegnu mai vistu fin’avà da u Statu per via di a Direzzione di a Sicurezza di l’Aviazione Civile (DSAC) è ancu di u sustegnu di a Cullettività di Corsica.
Infine, l’aeroportu di Figari hà oghje ghjornu un EDS 3 uperaziunale è si prepara à acquistà un secondu apparechju è à cuncepisce un novu sistema di gestione di i bagagli. Sò state iniziate e prucedure di comprera publica per l’espansione necessaria di l’istallazione, per a quale a DSAC hà datu u so approvu per i finanziamenti.
Cusì, l’aeroporti di a Corsica sò in traccia d’esse preparati in quantu à a so sicurezza perchè hè fattu tuttu per accresce a so capacità di detezzione è di reazzione in casu di minaccia, ma ancu per migliurà di modu significativu a fluidità di u trattamentu di i passageri, ciò chì hè assai utile è cunsigliatu durante i periudi di forte friquentazione.
François Lebailly : « Un livellu di sicurezza à l’altura di e sfide »
Avete fattu un sforzu chì ùn si era mai vistu fin’avà per megliurà a sicurezza aeroportuaria in Corsica. Hè rassicuratu u delegatu di a Securità di l’Aviazione Civile ?
I servizii di u Statu anu, hè vera, fattu un seguitu di u duminiu di a sicurezza aeroportuaria in Corsica, in particulare trà u 2023 è u 2025. Cusì, dopu à a fine di i travagli di megliurazione di l’aeroporti d’Aiacciu è di Figari, i quattru aeroporti cummerciali di Corsica duverianu esse cumplettamente attrazzati in quantu à e misure di sicurezza. Sò sottumessi sti travaglii à una scadenza imperativa di messa in cunfurmità per u 31 d’aostu di u 2027.
Hè significativu l’impegnu finanziariu pigliatu da a DGAC per sustene l’aeroporti : 16,3 milioni d’eurò investiti in Aiacciu è 9,8 milioni d’eurò in Figari. Rispechja l’impurtanza attribuita à u mantenimentu di un livellu di sicurezza chì risponde à l’esigenze regulamentarie.
In Aiacciu, avanzanu i travagli di custruzzione di u novu centru di sicurezza secondu u calendariu previstu ; in Figari, hè aspettata a nutificazione di u mercatu per a custruzzione di u novu centru di sicurezza. U prugettu di attrazzera di a piattaforma si trova dunque in una fasa critica.
S’elli sboccanu sti cantieri secondu u calendariu previstu, averà di fatti a Corsica aeroportuaria arnesi assai efficaci per assicurà un livellu di sicurezza à l’altura di e sfide di u trafficu isulanu. Di fatti, fermanu mubilizati i servizii di u Statu per assicurà si chì seranu messi in ballu i cantieri in anda cù a celerità ch’elli abbisognanu, è fin’à ch’elli sianu compii.
