E sirene di l’avvene sò forse quelle d’Omeru. U turchinu prufondu di un mare chì si stende finu à a curva di un orizonte adornatu d’isule brune, l’alti muri medievali spazzati da venti carchi di spruzzi marini, toghe nere chì s’ondeghjanu cum’è vele sopra i gradi di l’anfiteatru marinu in a Citadella genuvese di Bastia. Ùn saperemu dì s’ellu hè u viaghju à traversu i studii à u Campus di u Borgu un’Odissea omerica, ma sò propiu irresistibile ste sirene per i sessanta giovani diplumati chì anu ricevutu u pergamena chì incurona u successu di u so parcorsu.
Una nova era, un novu locu. Per a prima volta, sottu à l’auspici di l’EPCI di Corsica, si hè tenuta a ceremonia di graduazione di a classa di u 2025 in u core di a Citadella di Bastia, à u Mantinum, chì supraneghja u Mediterraniu cum’è simbulu di tutte e sfide di l’ecunumia futura. I nostri giovani ne sò a speranza è i guaranti. Anu ricevutu i laureati felicitazioni meritate da i partenarii è i raprisentanti istituziunali, frà i quali u merre di Bastia è presidente di l’EPCI di Corsica, Gilles Simeoni, chì hà spartutu u sentimentu di gioia è di suddisfazione di sta stonda.
Unu dopu à l’altru, dui prufessori permanenti, Camille Antoni è Joseph Erba, anu invitatu à sta tribuna à celu apertu i gruppi di studienti esciuti da e furmazione chì seguitanu : Cunsiglieru di Vendita Omnicanale (VCO), BTS Maneghjimentu Cummerciale Uperaziunale, BTS Gestione di Chjuche è Medie Imprese, è ancu e filiere piazzate sottu à a bandera di KEDGE Business School Corsica, Bachelor Responsabile di Sviluppu Cummerciale, Bachelor Capu di Prughjettu Web, Bachelor Incaricatu di e Risorse Umane.
Si ralegranu tutti di l’anni passati à u Campus di u Borgu per a qualità di i corsi è l’intesa famigliale fraterna trà l’elevi, felici di fà u tradiziunale lanciu di cappellu à u celu, chì marca a fine di i so studii è simbulizeghja un gestu d’emancipazione. Certi cuntinueranu i so studii, d’altri entreranu in u mondu di u travagliu. Intantu, a serata festosa si hè cunclusa cù a musica in i giardini appesi di u Palazzu, chì ùn hà appena disturbatu u sonnu ben meritatu di i Guvernatori.
Forzà a tutti !
Lauda Guidicelli-Sbraggia, Cunsigliera Esecutiva incaricata di a Ghjuventù è di l’Educazione à a Cullettività di Corsica, si hè rivolta à i giovani diplumati, dicendu li ch’ella celebrava u so travagliu seriu, e so notte bianche, i mumenti di dubbitu, ma soprattuttu i so prughjetti è u successu in e so carriere prufessiunale : « Site pienamente pronti à piglià iniziative è à fà a differenza. Siate fieri, siate ambiziosi, siate liberi ! »
Dopu avè felicitatu i prufessori è l’inseme di u persunale, u direttore di a furmazione, Pascal Agostini, hà dettu à i diplumati a fiducia posta in elli in questu mumentu di prima trinca induve l’IA è u cambiamentu climaticu anu da rivuluziunà l’ecunumia : « U vostru avvene hè pienu d’opportunità, ma ùn vi scurdate mai da induve venite… »
Jean-François Paoli, u presidente di a Cummissione di furmazione di l’EPCI di Corsica, era propiu cummossu, essendu statu studiente ellu stessu à a Scola di Cummerciu è di Gestione più di quaranta anni fà : « I statuti è i nomi di i centri di furmazione sò cambiati, ma micca a vuluntà d’apre si nantu à u mondu è u Mediterraniu. »
Hè incù u camisgiu di l’universitariu emeritu è prufessore d’ecunumia chì u deputatu Michel Castellani hà parlatu, è cum’è ultima parolla d’incuragimentu, hà chjamatu i diplumati, forse pensendu ancu à a prossima stagione di u Sporting : « Forzà a tutti ! »
È in fine, Jean Dominci, u primu vice presidente di l’EPCI, hà vulsutu fà e so felicitazioni à tutti i laureati è à i so prufessori, è ancu à tutte e squadre di a Direzzione di l’Insignamentu è di a Furmazione.
